mardi 17 janvier 2012

عمنا احمد فؤاد نجم : نوارة عروسة الثورة

140

آدي ياسيدي البت نوارة بنتي عروسة الثورة المصرية.. ربنا يحميها أقصد ربنا يحميهم كلهم ويحمي ثورتهم العظيمة المدهشة ثورة 25 يناير المجيدة وشوبش ياحبايب وعقبال عندكم جميعا.

نوارة بنتي النهاردة تبقي
بتخطي عتبة ليوم جديد
يارب خلي
يارب حافظ
يارب بارك
يارب زيد
يارب كبر
نوارة تكبر
وتبقي أكبر في كل عيد
لأ كل جمعة
لأ كل يوم
لأ كل ساعة
لأ كل لحظة
تنول وتحظي
وتزيد نباهة وتزيد ملاحظة
وتحظي مصر السعيدة بيهم
ويبقوا ليها وتبقي ليهم
غيطانها جنة
وترابها حنة
والنسمة خمرة
في قزازة حمرا
والنيل نجاشي
مافيش ماجاشي
تمللي ييجي أخضر مليجي
دايما يوفي دايما يكفي
كل الخلايق
يصبح صباحه فلاحه يمشي
علي شطه عايق
مافيش معاكسة مافيش مضايقة
مافيش عساكر وقهر تاني
كل الأماني بقت حقايق
يارب وفق يارب وافق
يارب زيد
واكتب عليهم في كل لحظة
فرح وعيد


أحمد فؤاد نجم
جريدة الوفد – 15 يناير 2012

Aucun commentaire:

Enregistrer un commentaire