محمود سعد لمرسى: "انت نسيت لما الشرطة قبضت عليك"

سخر محمود سعد من خطاب الرئيس مرسي للأمن المركزي، الذي قال فيه إن الشرطة كانت في قلب العبور الثاني الذي حدث يوم 25 يناير 2011.

وعلق سعد قائلا: الشرطة في القلب والعين.. محدش يقدر يتكلم.. ودي مش إضافة.. ومفيش مزايدة على الشرطة.. إحنا زعلانين من الشرطة دلوقت لأن بعضهم قتل المتظاهرين.. سحلوا الناس وبياخدوهم في الأقسام يضربوهم ويعذبوهم.. والوقائع دي ثابتة وعلى قمتها قصة الشهيد محمد الجندي.
وأضاف سعد: الشرطة فيها مشاكل والدكتور مرسي نفسه قال هنعيد هيكلة الشرطة والبلتاجي بيطلع يقول.. كل دة نختلف أو نتفق فيه.. عايز تقول إن الشرطة أعظم حاجة في الحياة أو أحسن من شرطة لندن وأمريكا قول ميجراش حاجة.. نفتخر بالشرطة بتاعتنا.. إنما أقول إن الشرطة كانت في القلب والعين يوم 25 يناير، وإن كانت الصدفة أن الثورة قامت يوم 25 يناير؟ يا نهار أسود؟ إيه ده؟ ده يتقال عليه إيه بقى؟.. ده اللي يتقال عليه هو فيه كده؟ فيرد حد ويقولك فيه كده وفيه كده وفيه كده.. ده اسمه كسر للتاريخ..

وتساءل سعد: يوم 25 يناير الشرطة كانت مشاركة في الثورة؟ ده الثورة منجحتش إلا لما كسرت الشرطة.

وأردف سعد: صفحة أنا آسف يا ريس، طلعت بقت مليون واحد بعد ما كانت حاجة وأربعين ألف بسبب حكم الإخوان.. عشان تعرفوا مدى نجاح حكم الإخوان.. الصفحة دي بتقول إذا شاركت الشرطة في الثورة، فلماذا يحاكم مبارك؟

وقال سعد: إنت نسيت لما الشرطة قبضت عليك أيام الثورة؟ ده انت ذات نفسك كنت مقبوض عليك.. نسيت الشرطة كانت بتعمل إيه في الإخوان؟

http://www.almesryoon.com/permalink/108599.html#.UUR_vjcWzDc