حس الدعابة فى بعد نجاح الثورة المصرية

 
وبعد نجاح الثورة، بدأ المصريين في الأبتهال بعدد من الدعوات لم يخل بعضها من الطرافة وحس الدعابة الذي يميز المصريين عن سائر شعوب العالم، رصدنا أبرزها في التالي: -    أن يكون الأنتخاب (رئاسي وبرلماني) ببطاقة الرقم القومي بدلا من لوغاريتمات البطاقة الأنتخابية.
-    أن يكون كرسي الرئاسة مصنوع من التيفال (عشان ما يلزقش).
-    عدم وضع صورة أي رئيس منتخب في أي مصالح حكومية أو خاصة والأكتفاء بعلم مصر.
-    محاكمة حبيب العادلي لخيانته مصر في جمعه الغضب.
-    إقصاء ومحاكمة صفوت الشريف مهندس النظام والمتحكم في الإعلام والسياسة طوال الثلاثين عاما الماضية.
-    عايزين الراجل اللي ورا عمر سليمان رئيسا للجمهورية.
-    البنات تدخل الجيش.
-    عدم دفع رشوة في أي مصلحة بعد الآن.
-    ترشيح شهداء ثورة 25 يناير لجائزة نوبل للسلام.
-    عايزين رئيس لا يكلف مصر المليارات لحمايته الشخصية.
-    عايزين محدش يقول لضابط شرطة (يا باشا).
-    عايزين دخل قناة السويس يبقى بالجنيه المصري، ويتم توجيهه لخدمه الشعب مش للقصر الجمهوري وحرس الرئيس.
-    إعادة خانة فصيلة الدم في بطاقة تحقيق الشخصية (الرقم القومي).
-    أن تستضيف مصر كأس العالم للكبار سنة 2026.
-    تعيين القذافي مشرفا على كوكب (كوميديا) على قناة الرسوم المتحركة (سبيس تون).
-    تأميم شركات حديد عز، وكل شركات لصوص النظام المخلوع.
-    منع مرتضى منصور من الظهور في أي قناة تلفزيوينة.
-    إسقاط بلوفر أحمد شفيق!!

كما تهكم آخرون بحس فكاهي على بعض الأحداث المصاحبة للثورة بتعليقات على طريقة إعلان إحدى المنتجات الغازية الشهيرة (يعني إيه كوك زيرو): - يعني حمادة هلال يكتشف لوحده ان شهداء 25 يناير ماتوا في أحداث يناير
- يعني طلاب الاخوان يعملوا مؤتمر في الجامعة والأمن يوصلهم الكهربا بتاعة السماعات!
- يعنى كل المصريين اللى بره عاوزين يرجعوا مصر يعيشوا ويتمتعوا بالحرية فيها وحسام حسن بيهدد بالهجرة!
- يعني فتحي سرور يتكلم عن تزوير الإنتخابات
- يعني الإخوان المسلمين يجتمعوا بالمجلس العسكري وأمن الدولة يبقى تنظيم محظور
- يعني الجيش يبعتلك مسجات أكتر من حبيبتك
- يعني تفقد ذاكرتك وتلاقي امن الدولة محتفظالك بنسخة منها
- يعني التراس زملكاوي يعترض لاول مره في التاريخ على ابراهيم حسن ويطالبه بالاعتذار
- يعني الاخوان يحضروا قداس والشباب يضرب تموره
- يعني البرادعي يطلع عالتلفزيون عادي ومبارك مش لاقي محامي يدافع عنه
- يعنى تمورة يعيط والرجل الى ورا عمر سليمان هو الى يتشهر
- يعنى تلاقى اسم حفيدك فى ملفات امن الدوله المحروقه وانت لسه ما اتجوزتش

فيما أرتفعت حدة السخرية في تعليقات آخرى عن الأحداث التي كانت ستصاحب فشل الثورة: - مانشيت الاهرام: ضبط ٨ ملايين من مثيرى الشغب
- ناس طالعة بتقول (أنا من يوم ٢٥ وأنا بايت فى ميدان مصطفى محمود)
- أغنية جديدة (أستاذ جمال مبارك ابن الريس مبارك).
- هنفضل عايشين على ذكرى الأهرامات وجون مجدى عبدالغنى فى كأس العالم اللى بيذلنا بيه لحد دلوقتى.
- أبوالغيط: مش قلت لكم احنا غير تونس؟!.
- منح العادلى قلادة النيل
- بطرس غالى يفرض ضريبة (احمد ربنا انك لسه عايش فى مصر).
- قرار جمهوري بإلغاء يوم الجمعة (هيبقى خميس سبت على طول).
- تغيير شعار الحزب الوطنى إلى (علشان تبقى تعمل راجل تانى).
- مرتضى منصور يهدد مارك ذكربرج مخترع الفيس بوك بسي دي!!
- طلعت زكريا يعلن البدء في تصوير الجزء الثاني من طباخ الريس بمشاركة سماح انور وزينه وعفاف شعيب
- ستظهر شعارات «ارفع راسك فوق لما تشوف حلمة ودنك»، «أنا هانتخبك يا ريس حتى لو دمى سال.. ولو انت ماترشحتش هانتخب ابنك جمال».
- تامر حسنى يقدم أغنية «كدهوه» ردا على أغنية محمد منير «إزاى».
- أمن الدولة يعلن المشاركة بفريق فى الدورى.. اسمه (اتحاد الملفات).

أشهر الإفيهات والنكت علي خطاب التنحي

رغم أن خطاب التنحي، الذي ألقاه اللواء عمر سليمان، كان محدداً، وخالي من أي لغط، وفوق كل هذا قصير ولم يتجاوز الدقيقة، إلا أن المصريين مارسوا عادتهم في خلق النكت وتركوا خطاب التنحي بكل تفاصيله وتوقفوا أمام الرجل الذي كان يقف وراء عمر سليمان
لحظة إلقاء خطاب التنحي كحارس خاص، حتي تحول الراجل في يوم وليلة الي أيقونة علي الفيس بوك، وملأت أخباره والتعليقات عليه مئات الصفحات، ووصل عدد أعضاء صفحته إلي أكثر من 100 ألف عضو في غضون ساعات كلهم إنهالوا عليه بالسخرية والاستهزاء وبدأت الافيهات عن هذا الرجل يتبادلها النشطاء في رسائل علي الموبايل منها: قناة الجزيرة. أبناء عن جلوس الرجل اللي واقف ورا عمر سليمان.
المتظاهرون في ميدان التحرير يهتفون «لو لم أكن مصرياً لوددت أن أكون الراجل اللي واقف ورا عمر سليمان»، أو الله - الوطن الراجل اللي ورا عمر سليمان، ومن التعليقات الشهيرة أيضا علي خطاب التنحي: أشهر ثلاث حاجات في مصر الآن ميدان التحرير، وائل غنيم، الراجل اللي خلف عمر سليمان.
لما عمر سليمان لقي ان الراجل اللي واقف وراه أشهر منه قرر تغيير اسمه الي الراجل اللي واقف قدام الرجل اللي ورا عمر سلميان.
كما دشن النشطاء عشرات الصفحات علي نفس وتيرة صفحة الراجل اللي واقف ورا عمر سليمان، منها صفحة «الراجل اللي واقف جنب عصام شرف، الراجل اللي واقف ورا الرجل اللي واقف ورا عمرو دياب، والراجل اللي واقف فوق العمود، والراجل اللي واقف ورا عم فتحي، فضلا عن عشرات الأغاني الساخرة التي تطلب معرفة هوية الشخص لم ينقطع سيل النكت، حتي خرج الرجل للناس وتعريفه بنفسه وهو مقدم أركان حرب حسين شريف قائد المجموعة 64 قتال من القوات الخاصة، مطالباً نشطاء الفيس بوك، بالتوقف عن السخرية واحترام خصوصيته هو وأسرته وهو ما دفع النشطاء إلي عمل صفحات تقدم اعتذارا له، منها صفحة «كلنا بنحب المقدم حسين شريف اللي واقف خلف عمر سلميان، والذي وصل أعضاءها إلي 15 ألف عضو، وغيرها صفحات كثيرة حملت في مضمونها اعتذارا صريحا لشخص المقدم حسين شريف ولم تقتصر إفيهات خطاب التنحي علي هذا الأمر بل ظهر علي موقع اليوتيوب عشرات مقاطع الفيديو لأطفال وشباب يتقمسون دور عمر سليمان وهو يلقي خطاب التنحي، وحققت تلك الفيديوهات حينها نسبة مشاهدة عالية، تجاوزت الملايين.
أما عن أشهر النكت التي خرجت بعد خطاب التنحي فكانت:

• «بيان رقم 4 للقوات المسلحة.. الرئيس مبارك لم يتنح ودي كانت اشتغالة ويهيب المجلس الأعلي بالمتظاهرين في التحرير التحلي بروح الدعابة قائلا لهم: «لو تحبوا نذيع هنذيع».
• الجيش مسك واحد ماشي في الشارع بعد حظر التجول وسألوه:
• أنت ليه انتهكت حظر التجول؟
• قال لهم: أصل أنا عندي تجول لا إرادي!
• نداء .. من ميدان التحرير إلي الإخوة الأشقاء العرب.. في حد مضايقكم تاني نخلعه قبل ما نترك الميدان.
• الرئيس مبارك قال إني خسارة في المصريين وتنحي وقرر انه يرشح نفسه لرئاسة تونس.. مما دفع ملايين التونسيين إلي المطالبة بعودة زين العابدين بن علي.
• عاجل ومؤكد: مبارك يسلم للجيش سلاطته ولم يسلم بابا غنوجه بعد.
• عاجل: سيتم انتقال السلطة بشكل سلمي وجدول زمني محدد الجدول هو الريس يحكم أحد وثلاثاء وخميس وعمر سلميان سبت واثنين وأربعاء، ويوم الجمعة مرة شفيق ومرة الجيش.. حسب اللي يصحي الأول.

الوفد